Raqs-e-Bismil

Sarfaroshi ki tamanna ab hamare dil mein hai

dekhna hai zor kitna baazoo-e-qaatil mein hai

charcha apnay qatl ka ab yaar ki mehfil mein hai

dekhna hai yeH tamasha kaun si manzil mein hai

kartaa nahin kyon doosra kuch baat-cheet

dekhta hoon main jise vo chup teri mehfil mein hai

ai shaheed-e-mulk-o-millat main tere oopar nisaar

ab teri himmat ka charcha gair ki mehfil mein hai

waqt aane de bataa denge tujhe ai aasmaan

ham abhi se kyaa bataien kya hamare dil mein hai

Kheench kar layee hai sab ko qatl hone ki ummeed

aashiqon ka aaj jamghat koocha-e-qaatil mein hai

rahbar-e- raahe mohabbat reh na jana raah mein

lazzat-e-sehra nawardi doori-e-manzil mein hai

desh par qurbaan hote jaao tum, ai hindiyon

zindagi ka raaz muzmir khanjar-e-qaatil mein hai

sahil-e-maqsood par le chal khudaara, nakhuda

aaj hindustan ki kashti badi mushkil mein hai

door ho ab hind sey tareek-e-bugz-o-hasad

bas yahi hasrat, yehi armaan hamarey dil mein hai

baam-e-raffat paar charha do desh par hokar fana

BISMIL ab itni hawas baqi hamarey dil mein hai

ab na agle walwale hain, aur na armaanon ki bheer

ek mit jaane ki hasrat ab dil-e-bismil mein hai

aaj maqtal men yeh qaatil kah raha hai baar-baar

kyaa shahaadat ki tamanna ab kisi ke dil mein hai?

By: Ramprasad “Bismil”